الفؤاد ترعاه العناية

الفؤاد ترعاه العناية

الشاعر : يوسف مصطفى التنى.



في الفؤاد ترعاه العناية ... بين ضلوعي الوطن العزيز

***** **** ***** ***** *****

لي عداه بسوي النكاية ... وان هزمت بلملم قواي
غير سلامتك ما لي غاية ... إن شاء الله تسلم وطني العزيز

***** **** ***** ***** *****

مرفعينين ضبلان وهازل ... شقوا بطن الاسد المنازل
نبقي حزمة كفانا المهازل ... ونبقى درقة وطنا عزيز

***** **** ***** ***** *****

ليه ما ارعي الوطن الرعاني ... والدهاه اشيله واعاني
الشباب والشيب شجعاني ... قالوا نفدي الوطن العزيز

***** **** ***** ***** *****

شفنا فيه جواب فيافي ... والبطير وبسابق السوافي
ما مراده عفارم عوافي ... بس يعظم وطني العزيز

***** **** ***** ***** *****

من حلق الريف لى سدودا ... البلاد معروفات حدودا
سودانا جبهة النبقالو خودة ... نتلافة ضرر وطنى العزيز

***** **** ***** ***** *****

طبيعى اعشق صيدو ورمالو ... ماببيعو واقول مالى مالو
وما بكون آلة البي حباله ... داير يكتف وطني العزيز

***** **** ***** ***** *****

بدينى بعتز وافخر وابشر ... مابهاب الموت المكشر
مابخش مدرسة المبشر ... عندى معهد وطني العزيز

***** **** ***** ***** *****

عندي وطني بقضيلي حاجة ... كيف اسيبه واروح لي خواجه
يغني وطنه ويحيجني حاجة ... فى هواك ياوطنى العزيز

***** **** ***** ***** *****

نحن للقومية النبيلة ... ما بندور عصبية القبيلة
تربي فينا ضغائن وبيلة ... تزيد مصايب الوطن العزيز

***** **** ***** ***** *****

مالي مال تاريخ القبيلة ... نحن أمه وحيده وأصيلة
علمونا جدودنا وقبيلة ... أمه واحده في وطن عزيز